Dili, Timor Leste   +670 78045486
Nicho Linux

Diretór FHT Aprezenta Impaktu AI ba Edukasaun iha Workshop Foinsa’e no Akademiku

Tersa-Feira, 8 Jullu 2025, Diretór Ezekutivu Fundasaun Hadomi Timor (FHT) Nicho Linux, ne’ebé hetan konvite husi CSEP hodi aprezenta iha Workshop kona-ba Lian Foinsa’e no Akadémiku sira nian kona-ba Edukasaun iha Polítika Emerjénsia, Diretur FHT ko’alia espesífikamente kona-ba Impaktu husi AI iha Setór Edukasaun. Nia destaka nesesidade urjente atu hadi’a infraestrutura dijitál, kapasidade profesór sira no polítika nasionál hodi prepara sistema edukasaun Timor-Leste nian ba integrasaun AI.

FHT reafirma ninia kompromisu liu husi programa literasia dijitál iha Timor-Leste, apoiu ba sistema eskolár, kontinua halo advokasia ba edukasaun inkluzivu hodi bele garante kualidade edukasaun iha futuru. Iha aprezentasaun ne’e, Diretur FHT mós subliña katak lahó investimentu estratéjiku no reforma kurríkulu, Timor-Leste iha risku atu husik hela iha kotuk iha paizajen edukasaun globál ne’ebé orienta ba intelejénsia artifisiál.

Diretur Nicho Linux haforsa tan katak hanesan parte ida husi FHT nia kontribuisaun iha kapasitasaun ne’ebé foka ba abilidade dijitál sira, FHT fasilita ona formasaun diretamente ba partisipante liu 3,000 inklui estudante, profesór, ofisiál eleisaun ka STAE, sosiedade sivíl, mídia, no funsionáriu governu nian liu husi formasaun oioin hanesan Literasia Dijitál, Seguransa Internet, Konxiénsia Siberseguransa, IoT, Intelijénsia Artifisiál no seluk tan. Esforsu hirak ne’e konsege hetan apoiu iha tinan balun liu ba husi Sekretáriu Estadu Juventude no Desportu, Gabinete ba Fundu Sosiedade Sivíl, Timor Plaza no liu husi parseria ho ONG Belun hodi fó formasaun espesializada ba pesoál STAE nian husi 12 Munisipiu inklui RAEOA.

#FHT#artificialintelligence#digitalliteracy#DigitalInclusion#hadomitimor#follower#educationforall

Workshop IOT Hadomi Timor

𝗙𝗛𝗧 𝗻𝗶𝗮 𝗪𝗼𝗿𝗸𝘀𝗵𝗼𝗽 𝗸𝗼𝗻𝗮-𝗯𝗮 𝗜𝗼𝗧 𝗟𝗮’𝗼 𝗵𝗼 𝗦𝘂𝘀𝗲𝘀𝘂

Loron Domingu, 6 Jullu 2025, Fundasaun Hadomi Timor (FHT) no Timor Plaza hala’o ho susesu Workshop Internet of Things (IoT) uza Simulasaun Wokwi iha IT Zone, Timor Plaza at Dili Central. Partisipante sira esplora oinsá sensor sira no hardware liga ba internet, hetan koñesimentu prátiku kona-ba aplikasaun teknolojia nian iha mundu reál.

FHT hato’o ninia apresiasaun sinseru ba Timor Plaza ba kolaborasaun no apoiu ba fatin, no agradesimentu espesiál ba Sr. Samuel ba ninia fasilitasaun exelente no orientasaun téknika durante sesaun tomak.

Akompaña nafatin ba workshop sira seluk ne’ebé orientadu ba inovasaun husi FHT!

Vaga Vol Media

Anúnsiu Vaga Voluntáriu – Asistente Media Officer

Fundasaun Hadomi Timor (FHT) lansa oportunidade ka vaga ba foinsa’e Timor-Leste ka estranjeiru iha área Media nian. FHT buka kandidatu voluntariu atu servi hanesan Voluntáriu Asistente Media Officer iha tempu voluntariu ba fulan tolu (3)

📌 Responsabilidade Prinsipál:

  • Apoiu iha preparasaun konténudu multimedia (foto, video, poster no infografiku)
  • Apoiu iha administra midia sosiál (Facebook, Website no Tiktok)
  • Rejista atividade sira FHT (foto no video)
  • Apoiu iha dezenvolvimentu materiál komunikasaun (Karta, Aprezentasaun no Sertifikadu)
  • Apoiu Halo intrevista sira ba komunidade ka parseiru relevante sira

✅ Kriteria Kandidatu:

  1. Iha motivasaun atu aprende no kontribui ba asuntu media nian
  2. Iha esperiénsia ka interesa iha área media, fotografia, video, desain no komunikasaun
  3. Iha abilidade básika iha komputador (Word, PowerPoint, Canva ka programasaun edit video/foto)
  4. Komportamentu diak, responsavel no iha kapasidade servisu iha ekipa
  5. Iha tempu livre atu fó kontribuisaun ba 40 oras iha semana (tamba full-time)

📄 Dokumentu Requere:

  1. CV (Curriculum Vitae)
  2. Karta aplikasaun dirije ba Diretór FHT ho referénsia rua
  3. Diploma ka Sertifikadu relevante sira (se iha)
  4. Kopia Billete Identidade (BI)

📆 Data Limite:

1 Jullu 2025

📲 Kona ba Submisaun Dokumentu:

  • Hatama liu Whatsapp (scan QR kode iha poster)
  • Ka bele entrega diretu iha Escritóriu Fundasaun Hadomi Timor, Farol – Dili

ℹ️ Informasaun Adisionál:

  • Períodu voluntáriu: 3 fulan (Jullo–Setembru)
  • Depois de 3 fulan, FHT sei avalia atu bele kontinua iha status regular ka kontratu
  • Oportunidade boot atu aprende iha eventu boot sira

📧 Website: www.hadomitimor.info.tl

Vaga Vol Media
Vaga Vol Media

Director Ezecutivo Fundasaun Hadomi Timor (FHT) Sr. Nicho Linux ho ekipa halo audensia ho Director Nacional Empregu Exterior Sr. João Correia Pereira

Loron Tersa 23 Jullu 2024, Director Fundasaun Hadomi Timor (FHT) Sr. Nicho Linux ho ekipa halo audensia ho Director Nacional Empregu Exterior Sr. João Correia Pereira iha fatin servisu Director DNEE nian iha Becora ho
Objetivu atu introdus ezistensia FHT nian no diskute kona-ba inisiativa sira ba formasaun lian Japaun no lian Ingles ba kandidatura vaga servisu iha Australia inklui hato’o hela preokupasaun kandidatu trabalador sira nebe passa ezame EPS-TOPIC iha tinan 2022 maibe seidauk hetan kontratu husi Korea.

Iha biban ne’e Diretor FHT, Sr. Nicho Linux, hato’o parabens ba Sr. João Correia Pereira ba knar foun nudar Diretur DNEE nian no informa mos ba Diretor DNEE katak FHT hakarak kontinua apoia iha desenvolvimentu servisu sira iha Timor-Leste, inklui kriasaun oportunidade ba foinsa’e sira no ema hotu nebe atu hasa’e sira nia abilidade hodi bele kompete merkadu servisu rai liur nomos rai laran.

Director FHT aprezenta mos katak, husi 2021, FHT kolabora ona ho DNEE-SEFOPE hodi fasilita formasaun lian Korea ba formando sira, ho rezultadu pozitivu tebes tamba iha 2023 formando sira husi FHT nebe pasa iha ezame EPS-TOPIC kuaze 100 pessoas, tinan ida ne’e tuir dadus provozoriu FHT nian katak 22 pessoas mak passa ona iha area Fabrika no FHT espera katak numeru passa sei aumenta tan iha area agrikultura no peskas.
Director DNEE, Sr. João Correia Pereira, sublinha katak Governu fo prioridade liu ba kualidade formasaun, no laos kuantidade, atu prepara sira nia ema sira ba servisu iha rai liur ho abilidade tekniku nebe adekuadu. Tuir nia, kandidatura vaga Australia nian hatudu sira nia interese boot, maibe dezafiu ba ita mak abilidade iha lian Ingles. Nune’e SEFOPE hahu estabelese sentru formasaun iha munisipiu sira atu aumenta abilidade lian Ingles ba kandidatu vaga servisu Australia nian.

Director DNEE mos husu FHT atu garante kualidade formasaun lian Ingles hodi fasilita no hadi’a formando sira nia abilidade iha ingles nune’e bele passa iha teste tuir mai.

Sobre preokupasaun kandidatu trabalador Korea nebe passa ezame EPS-TOPIC iha 2022, DNEE-SEFOPE hamutuk ho HRD Korea kontinua esforsu no tenta rezolve no balun hahu rezolve ona no balun iha prosesu nia laran tamba asuntu refere DNEE halo deit aproximasaun no sistema sira ne’e iha kontrolu Korea nian.
Rezultadu husi enkontru ne’e, FHT nia planu kona ba formasaun lian Japaun no Ingles ba kandidatura vaga servisu Australia nian hetan apoio masimu husi Diretur DNEE, importante mak asegura kualidade formasaun.
Enkontru ne’e hetan mos partisipasaun husi asesor Diretur DNEE no ekipa FHT.

Remata
Media FHT

hadomi timor

Info Foun: Kartaun Ezame Ba Area PESKAS Disponivel ona iha FHT

Fundasaun Hadomi Timor (FHT) hakarak anunsiu ba Estudante hotu Lian Korea 🇰🇷 FHT nian nebé remata ona kursu iha tinan 2022 ka 2023 liu-liu ba Estudante sira nebé konsege rejistu ona ba Ezame EPS-TOPIC iha SEFOPE tinan nee iha Area PESKAS katak Ita boot sira nia Kartaun Ezame Disponivel ona iha FHT Farol ho Ramu 5 iha Dili, nune’e FHT hakarak informa:

– Ba Estudante sira nebé remata ona kursu bele hakat mai FHT Farol hodi foti Kartaun Ezame iha area Peskas.

– Ba Estudante sira nebé Prosesu Aprendisazem lao helo, ita bot sira bele ba foti Kartaun Ezame tuir atual orariu formasaun nian.

Kartaun Ezame Iha Area PESKAS Disponivel ona iha:

1. FHT Bidau Santa-Ana

2. FHT Becora

3. FHT Caicoli

4. FHT Mandarin

5. FHT Kampung Baru no

6. FHT Farol

Hakarak ba servisu iha Korea 🇰🇷 hetan Salariu Sufisiente hodi sustenta moris lorloron nia Xavi ida deit mak TENKI ESTUDA, ESTUDA no ESTUDA.

hadomi timor
Fundasau Hadomi Timor, Farol

Remata*

Estudante FHT Passa iha Ezame UBT EPS-TOPIC

Ohin, Loron Kinta 13 Jullu 2023, Estudante Fundasaun Hadomi Timor ho naran Devid Kapitan passa ona iha Ezame UBT EPS-TOPIC iha SEFOPE ho valor 57.5.

Enkuantu formasaun Lian Korea iha Fundasaun Hadomi Timor estabelese iha 2022 no estudante sira nebe passa ona ezame iha 2022 balun servisu ona iha KOREA no balun sei hein atu aranka tan.


Parabens Alin no Parabens mos ba Formadora Bin Ana Teresa

Devid Kapitan, Estudante Lian Korea Fundasaun Hadomi Timor
fundasaun hadomi timor

FHT Lansa Kursu Administrasaun no Finansa

Iha Loron 11 Janeiru 2022, Fundasaun Hadomi Timor (FHT) liu husi programa Formasaun Profesional lansa tan programa kursu foun ho Kursu Administrasaun no Finansa, ho programa Kursu Administrasaun no Finansa ida ne’e estudante sira sei estuda fokus liu ba servisu tekniku administrativa no finansa ho mekanizmu teknologia sira nebe eziste no tuir duni nesesidade sira nebe releventa ba area rua refere.

Kursu Administrasaun no Finansa nia durasaun kursu : Fulan 7 + stajiu fulan 2
Kursu Administrasaun no Finansa simu estudante foun tinan ida dala rua (2) deit.

Kursu Administrasaun no Finansa :

  1. Registu $15, inkluindu Sertifikadu
  2. Kustu Kada Fulan $25 deit

Kursu Administrasaun no Finansa garante kualidade estudante ho razaun :

  1. Teoria 20% no Pratika 80%
  2. Treinador iha Esperensia lubuk ho provas 
  3. Fasilidade Sufisiente

Ba Detallu informasaun bele haree no lee iha browsura iha okos.

Obrigado

Kursu Administrasaun no Finansa

Media FHT

hadomi timor

Fundasaun Hadomi Timor hahu loke kursu Lian Korea

Loron 16 Agusto 2021, Fundasaun Hadomi Timor – FHT hahu prosesu aprendisagem Kursu Lian Korea.

FHT hahu iha planu ona oinsa atu fo kapasitasaun ba foin sa’e sira hodi kompete ba kampu de serbisu iha rai laran tantu iha rai liur, nune’e atu konkretiza planu ida ne’e FHT inisiu programa kursu ho Lian Korea atu foin sa’e sira aprende no bele tuir teste husi SEFOPE hodi ba serbisu iha Nasaun Korea hanesan Seasonal Worker.

FHT kompremetidu atu iha tempu badak sei kopera ho SEFOPE hodi haree asuntu ida ne’e ho seriu no bele fasilita foin sa’e sira atu bele asesu serbisu iha Korea.

Ami sei kontinua simu estudante foun ba Kursu Lian Korea ne’e rasik, nune’e ba foin sa’e sira nebe iha interese bele hakat mai dadauk, ami nia fatin hamutuk ho NGO Luta Hamutuk, farol no Fundasaun Falur Rate Laek, mandarin.

Agora dadauk FHT hahu ona aula rua iha dader tuku 9 to’o tuku 11 no loraik tuku 4 to’o tuku 6, aula ida ne’e lao loron tolu husi segunda, tersa no kuarta.

hadomi timor

Fundasaun Hadomi Timor organiza workshop Design Grafis – Inkscape

Loron 14 Agusto 2021, Fundasaun Hadomi TIMOR – FHT realiza workshop kona ba Graphic Design ho Software OPEN SOURCE INKSCAPE, fasilita husi Sr. Miguel Gamboa, Gamboa hanesan alumni ida husi Fundasaun Hadomi Timor iha programa kursu IT SMART nian no Gamboa hanesan estudante ida nebe sempre hatudu nia prestasaun diak tebes durante hala’o nia prosesu aprendisagem iha FHT, workshop ida ne’e hetan apoio tekniku husi ekipa IT SMART Academy, iha salaun Luta Hamutuk farol, Dili.

Objetivu husi workshop Design Grafis ne’e atu estudante ka partisipante sira bele iha abilidade hodi kria objetu rasik hanesan dezenu Logo, Banner, Browsura, Kamizola, Mapa, Livru no objetu sira seluk tan.

Partisipante sira iha Workshop Design Grafis – INKSCAPE ida ne’e mai husi estudante universitariu publiku no privadu sira, estudante sira ensinu sekundariu tekniku vokasional, alumni no estudante ativa IT Smart, programa espesifiku sira iha Fundasaun Hadomi Timor nian no publiku em jeral.

Iha biban ida ne’e Fundasaun Hadomi Timor hato’o mos agradese ba Sr Brians Korton nebe Ohin mai partisipa workshop hanesan partisipante.

Sr. Brians Korton hanesan formador Lian Ingles iha Fundasaun Hadomi Timor ne’e rasik.

Workshop Design Grafis Inkscape

Bravo FHT

remata

Media Hadomi Timor

hadomi timor

Diretur Fundasaun Hadomi Timor Nicho Linux aprezenta materia ICT ba estajiariu husi Unpaz, Sao Miguel no FPDTL

Loron 11 Agusto 2021, Diretur Fundasaun Hadomi Timor Sr. Abrao Monteiro ‘Nicho Linux’ hetan konvite husi Luta Hamutuk hodi aprezenta materia liga ho ezistensia no implementasaun Teknolojia Informasaun no Komunikasaun – TIK ba dezenvolvimentu Nasional Timor-Leste nian ba estajiariu husi Unpaz, Sao Miguel no FPDTL iha salaun Caffee & Books Luta Hamutuk, farol, Dili.

Foto : Diretur Nicho Linux aprezenta hela materia ba estajiariu sira husi UNPAZ, Sao Miguel no FPDTL

Objetivu husi aprezentasaun ne’e atu fo konesementu ba estudante estajiariu sira kona ba mudansa teknolojia dijital iha rai doben Timor-Leste, nune’e estudante sira bele perpara an diak liu tan hodi adapta teknolojia sira nebe sempre mosu ho mudansa foun, iha parte seluk esplika mos oinsa estudante sira bele uza internet ho saudavel nune’e bele benefisiu ba sira nian an iha futuru no ba nasaun Timor-Leste ne’e nia diak.

Foto : Diretur Nicho Linux aprezenta hela materia ba estajiariu sira