Workshop ba WordPress no Blogspot, Sesta 30 Junu 2021 no Sabadu 31 Junu 2021, Agora, mai lalais rejistu. Fatin Limitadu
Informasaun Kursu IT Smart, Lian Korea, Inlges, Konstrusaun Sivil, Kompletu lee iha Browsura
Aban, Hadomi Timor hahu reativa formasaun non-formal
Loron 18 Jullu 2021, Diretur Fundasaun Hadomi Timor – FHT Sr. Nicho Linux Ho ekipa tomak deside sei reativa formasaun non-formal hahu aban loron 19 Jullu 2021 ba tipu formasaun hotu-hotu hanesan Lian Korea, IT SMART, Kursu Programa Espesifiku no Kursu programa sira seluk, ho nune’e FHT konvida estudante hotu-hotu Fundasaun nian atu hahu hakat mai sentru hodi tuir formasaun hanesan baibain.
Kuaze fulan 5 FHT nia serbisu liuliu formasaun suspende tamba tuir desizaun Estadu no Governu nian nebe deside aplika Serka Sanitaria no Konfinamentu Domisiliariu Obrigatoriu ho razaun Pandemia COVID-19 nebe afeita nasaun hotu-hotu inklui Timor-Leste rasik hodi prevene pandemia ne’e.
Media FHT
Fundasaun Hadomi Timor organiza workhsop Microsoft Office Word no Power Point Basic & Advance
Loron 17 Jullu 2021, Fundasaun Hadomi Timor – FHT organiza workshop kona ba Microsoft Office Word no Power Point Basic & Advance iha salaun Coffee & Books Luta Hamutuk, farol Dili.
Objetivu husi workshop atu kapasita foin sa’e sira hodi iha konesementu ba operasaun baziku no avansadu ba aplikasaun Microsoft Office Word no Power Point ba sira nia atividade aprendisagem no serbisu lorloron nian.
Fasilitador ba workshop refere mak Sr. Hermundo Barreto no apoio tekniku husi Ekipa IT SMART ACADEMY.
Partisipante sira iha Workshop WordPress ida ne’e mai husi estudante universitariu publiku no privadu sira, estudante sira ensinu sekundariu tekniku vokasional, alumni no estudante ativa IT Smart, programa espesifiku sira iha Fundasaun Hadomi Timor nian no publiku em jeral.
Fundasaun Hadomi Timor organiza workshop Web Design with Pure HTML & CSS
Loron 10 Jullu 2021, Fundasaun Hadomi Timor – FHT realiza Workshop ho tema Web Design with Pure HTML & CSS iha Salaun Coffee & Books Luta Hamutuk, farol Dili.
Objetivu husi workshop ne’e atu ajuda estudante sira fo konesementu hodi kria rasik sira nia website ka dezenu rasik sira nia portal ka instituisaun sira nian, nune’e bele ajuda halo digitalizasaun informasaun iha instituisaun sira, tamba Fundasaun Hadomi Timor haree katak iha instituisaun barak mak seidauk iha website hodi publika sira nia atividade lorloron nian.
Fundasaun Hadomi Timor iha nafatin komitmentu bot hodi kontinua organiza workshop ho topiku oioin nune’e bele ajuda sidadaun sira hodi kontribui ba dezenvolvimentu Timor-Leste nian liuliu iha area Teknolojia Digital.
Partisipante sira workshop ne’e mai husi estudante ativu UNTL, IOB, DIT, Unital no eskola sekundaria publiku no privadu iha Dili laran inklui sira nebe graduana ona husi Universidade balun, workshop refere fasilita husi Sr. Jose Alfredo, Alumni IT SMART Fundasaun Hadomi Timor no atual staff Hadomi Timor no atividade ne’e suporta masimu husi IT SMART ACADEMY.
SEKOMS sei lansa kompetisaun “content Creator” ba Youtube.
Fundasaun Hadomi Timor, tersa-feira 15 Junu 2021, Sekretáriu Estadu ba Komunikasaun Sosiál,(SECOMS) Merício Juvinal dos Reis “AKARA”, hato’o afirmasaun ne’e, bainhira hala’o sorumutu ho koordenador Youtuber Timor-Leste, Abrão Monteiro Nicolinux, iha sala reuniaun SEKOMS, Palásiu Governu, Dili.
Assesora SEKOMS Sra. Titi Ribeiro 
SEKOMS Sr. Mericio Juvinal dos Reis – Akara
” SEKOMS sei lansa kompetisaun ne’e iha fulan ida ne’e planu no enkoraja komunidade Youtuber Timor-Leste no joven kreativu sira atu partisipa”, dehan akara.
“AKARA”, afirma, kompetisaun ne’e hanesan oportunidade ida atu apoiu jovem sira ne’ebé maka iha kreatividade liu husi produz Video ho tema oi-oin.
Koordenador Youtuber Timor-Leste, Abrão Monteiro Nicolinux, apresia ho inisiativa SEKOMS no prontu atu partisipa iha kompetisaun refere. Inskrisaun ba kompetisaun sei loke iha tempu besik.
Iha Enkontru ne’e akompaña mós husi Xefe Gabinete SEKOMS, Asesora SEKOMS no ekipa media Gabinete SEKOMS.*Dms
Fontes : SEKOMS
Timorese Portugese Social Club apoio hahan baziku ba estudante sira hela iha kost
Ohin 21 Abril 2021, Fundasaun Hadomi Timor – FHT entrega hahan baziku hanesan fos sakas 10, supermie, mina, bikan masa no seluk tan ba estudantes sira hela iha kos, husi diferente municipiu no diferente eskola nebé afeta ba inundasaun iha loron 04 Abril 2021 foin lalais ne’e no ho aplikasaun Estadu Emerjensia liuliu Serka Sanitaria iha municipiu Dili, estudante sira nebe ohin simu hahan baziku hamutuk 28 estudantes tuir lista nebe Fundasaun hato’o ba Timorese Portuguese Social Club – Darwin – TPSC.
Objetivu husi distribuisaun hahan baziku mak atu hakman uitoan todan nebe estudante sira hela iha kos infrenta tamba ho akontesementu dezastre naturais no aplikasaun Estadu Emerjensia liuliu mos aplikasaun Serka Sanitaria iha municipiu Dili.
Hahan baziku sira nebe Fundasaun Hadomi Timor ohin distribui ba estudante sira ne’e mai husi apoio Timorese Portugues Social Club – Darwin.
Diretur FHT Sr. Abrão Monteiro mos hatete ho apoio hahan nebe oferese husi TPSC atraves FHT ne’e hanesan ajudus emerjensia hodi estudante sirabele aguenta loron balu nian laran hodi kontinua hein ajudus husi Governu ka Estadu Timor-Leste.
Diretur FHT hamutuk ho estudante sira senti kontente no agradese tebes ba apoio hirak husi TPSC tamba iha situasaun difisil ida ne’e, ami estudante sira bele hetan duni apoio hahan baziku balun mesmu uitoan maibe ne’e naton ona hodi ami aguenta iha semana ida ka rua.
Reamata
Media Hadomi Timor
WCHT Organiza Workshop WordPress
Ohin Loron Domingu 28 Fevereiru 2021, Fundasaun Hadomi Timor liu husi divizaun Web Community Hadomi Timor – WCHT organiza workshop loron sorin kona ba Content Management System ka CMS WordPress iha salaun Coffee and Books Luta Hamutuk – Hadomi Timor farol, Dili.
Materia sira nebe ohin aprezenta no pratika iha workshop ne’e mak hanesan Konesementu Jeral kona ba saida mak CMS liu-liu WordPress ne’e rasik, instalasaun wordPress iha localhost ho nia konfigurasaun baziku sira, konfigura layout, template, plugin no Customize baziku seluk tan.
Fasilitador sira iha workshop ohin mak hanesan Jose Alfredo, Cipriano da Costa, Hermundus Barreto, Feliciano no Julia.
Partisipante sira iha Workshop WordPress ohin mai husi estudante universitariu publiku no privadu sira, estudante sira ensinu sekundariu tekniku vokasional, alumni no estudante ativa IT Smart, programa espesifiku sira iha Fundasaun Hadomi Timor nian no publiku em jeral.
Media FHT
Despedida Estajiariu IT SMART hamutuk ho Ekipa IT Timor Telecom
Loron segunda feira 15 fevereiru 2021, Reprezentante husi Fundasaun Hadomi Timor – FHT partisipa iha serimonia despedida husi estudante estajiariu Centru Formasaun FHT ne’ebe hala’o sira nia estajiu iha Operador Telekomunikasaun Timor Telecom liuliu iha Departementu IT, hahus iha loron 14 Dezembro 2020 no ohin termina ona sira nia estajiu liu husi serimonia refere.
Ho prezensa reprezentante FHT nian iha serimonia simples ne’e halo parte rekonñesimentu ba estudante estajiariu nain rua ne’ebe halao estajiu iha fatin ne’e ho objetivu ida katak atu bele intende diak liu tan informasaun husi estudante estajiariu sira relasiona ho atividade ne’ebe durante hala’o iha fatin estajiu liu-liu iha Departementu IT nian.
Iha okaziaun ne’e Reprezentante husi FHT Sr. Hermenegildo Soares hato’o agradesimentu ba Parte Rekursus Humanus Operador Telekomunikasaun Timor Telecom nian, Dr. Operador Telekomunikasaun Timor Telecom no Xefe Departementu IT nian nebe durante fulan 2 halo ona akonpanhamentu ba estajiariu sira iha envairomentu servisu atendimentu IT nian iha Operador Telekomunikasaun Timor Telecom Caicoli DILi, hafoin ida ne’e rona mos intervensun husi Dr. Departementu IT Operador Telekomunikasaun Timor Telecom Sr. Jose Dias hateten relasiona ho atividade estajiariu sira nian durante estajiu fulan 2 bele iha konesementu ba envairomentu mundu serbisu nian no ho faze sira hanesan ne’e bele aumenta liu tan alin sira nia konñesimentu teknika liu-liu servisu iha area IT nian, aumezmu tempu aprezenta formalmente avaliasaun estudante estajiariu ba Reprezentante FHT katak; “ Nelson & Manuel nia komportamentu diak tamba bele komprimenta rigimentu ne’ebe estabelese husi Departementu IT nian”.
Ho intervensaun husi parte hirak ne’e mak Fundasaun Hadomi Timor no Operador Telekomunikasaun Timor Telecom nafatin iha kolaborasaun diak ba futuru nune’e estajiariu sira husi sentru formasaun FHT bele kontinua desloka ba fatin ida ne’e.
Media Fundasaun Hadomi Timor
Fundasaun Hadomi Timor realiza enkontru reguler ho staff – estajiariu ESTV-GTI no ESTVC-MM
Loron 01 Fevereiru 2021, Fundasaun Hadomi Timor – FHT realiza enkontru reguler ho staff, estajiariu ESTV-GTI no ESTVC-MM hodi kolia kona ba serbisu nebe hala’o ona iha fulan janeiru no atu halo tan ba fulan sira tuir mai.
Agenda sira nebe kolia iha sorumutu ne mak hanesan planu serbisu ba formasaun, atualiza progresu kursu IT SMART no Ingles (rejistrasaun, orariu, alokasaun aula no pagamentu), planu serbisu ba estajiariu sira husi ESTV-GTI no ESTVC-MM, konfirmasaun estajiu husi programa IT SMART FHT nian ba instituisaun sira governu no privadu, atualiza serbsiu Website Community – HT no Dili Blogger Community – HT, re-estrutura FHT nian ho deskrisaun serbisu ba kada divizaun no pozisaun, Planu ba Dezenu ID Card ba Staff FHT
Iha Sorumutu ne’e Diretur Nicho Linux husu funsionariu sira atu serbisu makas ho responsabilidade nebe tutela ona ba kada divizaun hodi atinji objetivu fundasaun nian.
Partisipantes sira iha sorumutu ne mak hanesan, Diretur FHT Sr, Nicho Linux, Jestor Programa Sr. Sipriano da Costa, Koord Administrasaun no Finansa Sr. Hermenegildo Soares, Koord Programa Formasaun – ISA – Dijitalizasaun Sr. Jose Alfredo, Assistant Media officer Sr. Miguel Gamboa, estajiariu ESTV-GTI (Maia Sarmento, Fabiao Marcal no Xlidia Goncalves) no estajiariu ESTVC-MM ( Januario Madeira, Nicolau Soares, Marcelino de Deus, Silvestre Afonso).
Media Officer